LIMA, AP.- Polis peruano a anunsiá djárason di a konfiská un tonelada di droga ku mester a wòrdu mandá Spaña den paketenan ku etikèt ku potrèt di narkotrafikantenan El Chapo i Pablo Escobar pa asina demostrá e produktonan su ‘puresa’.
E hefe di polis antidroga, Hector Loayza, a bisa ku 1.150 kilo di droga lo a wòrdu kamuflá den desena di kaha ku tabata kontené piska di fris i ku e total di e karga tabatin un preis di 45 mion dòler den hafnan spañó. E kokaina lo a sali di e haf peruano di Paita, serka di frontera ku Ecuador.
Den e operashon, ocho peruano i kuater kolombiano a wòrdu detené. Nan ta integrantenan di un gang narkotrafikante.
Loayza a agregá ku e grupo kapturá no tabatin relashon ku Guzman ni ku Escobar, pero dor di uso di e imágennan di e mehikano i kolombiano, nan a purba demostrá e puresa di e droganan ku nan tabata bende aki.
Riba potrètnan usá komo etikètnan riba e paketenan, Guzman tin un pèchi di beisbòl ku un arma, miéntras Escobar ta riba un motersaikel.
Den pasado, polis peruano a konfiská kokaina ku e símbolonan mas straño, entre nan, e potrètnan di e estrea argentino di futbòl Lionel Messi, bistí ku un unifòrm di Barcelona, ku eskudo di arma di e rei Spañó Felipe VI. Otro figuranan mas ordinario tabata kabai, para i dòlfein.
