NEW YORK, AP.- E piloto di e helikòpter ku a kai na East River di Manhattan i provoká morto di sinku persona, a pidi ousilio pa problemanan den e motor promé ku el a kai den awanan friu di e riu di New York.
Un di e víktimanan di e aksidente, Carla Vallejos, tabata un siudadano argentino, segun konfirmashon di konsulado argentino den New York. E hóben tabatin 29 aña i tabata komo turista den e siudat, huntu ku un amiga.
Grabashonnan ta mustra ku e piloto a hasi un yamada di ousilio i a grita “Mayday, Mayday, Mayday”, miéntras e helikòpter tabata kayendo djadumingu anochi. El a indiká “Fayo di motor, East River” i el a duna un hotèl komo referensia.
E operador na e base tabatin problema pa komprondé loke e piloto tabata bisa. E Hunta Nashonal pa Seguridat den Transporte a manda investigadónan djaluna na e sitio di e insidente.
E helikòpter a wòrdu kontratá di forma privá pa un seshon fotográfiko.
E pilot a wòrdu reskatá. Sambuyadónan di ekipo di reskate mester a saka algun pasahero di nan faha di seguridat miéntras nan tabata boka abou.
“E sambuyadónan a tuma hopi tempu pa saka e hendenan aki, apesar di a purba hasi esaki mas lihé posibel”, asina e komandante di bomberonan Daniel Nigro a bisa.
