WILLEMSTAD.- Relashoná ku e kurpa sin bida di e dama ku a keda enkontrá den mondi na Westpunt riba djamars 29 di febrüari 2024 polis a realisá un detenshon mas, asina polis a duna di konosé awe mainta.
Riba djaweps 14 di mart 2024 alrededor di 18.45’or, e tim ku ta investigá kasonan di homisidio, a detené e hòmber J.A.P, di 23 aña di edat nasé na Kòrsou. Detenshon di e hòmber akí a tuma lugá na un Minimarket riba Gosieweg. Despues e tim a tene un entrada hudisial na un kas den Monte Carmelo.
Durante di e entrada hudisial a haña i konfiská artíkulonan ku ta di importansia pa e investigashon. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.
Djamars 5 di mart polis a detené kaba e hòmber F.K.J.B., di 37 aña di edat nasé na Kòrsou relashoná ku e kaso. Detenshon di e hòmber akí tambe a tuma lugá na un Minimarket riba Gosieweg.
