WILLEMSTAD.– E turista argentino ku ayera a konfrontá problema i a resultá den fondo di laman na playa di Mambo a fayesé. Asina polis a duna di konosé awe tardi. E turista a keda seriamente leshona i a bai den fondo. Un grupo di militar hulandes ku djaluna a bin fo’i Hulanda i djamars tabata riba playa di Mambo a sak’é for di awa i reanim’é pa kasi 30 minüt. Esaki a duna espasio pa ambulans yega i a transport’é den un situashon delikado pa hospital. Na yegada na CMC dòkter di warda na Sala di Emergensia a konstatá morto di e hòmber.
Polis awe tardi a splika ku ta trata di Angelo Fabio Roman, di 39 aña. E hòmber turista tabata di bishitá na Kòrsou huntu ku su famia riba un barku Krusero.
E grupo di militarnan ta forma parti di e ‘Compagnie in de West’ nobo di Defensa den Region Karibe Hulandes. E aktual ‘Compagnie in de West’ riba termino kortiku lo pasa su tareanan pa e unidat nobo.
