WASHINGTON, MERKA, AFP.- E hefe di diplomasia di Merka, Mike Pompeo, a anunsiá djárason ku lo kastigá algun empleado di e empresa di telekomunikashon chines Huawei.
“E departamento di Estado lo imponé restrikshon di visa kontra sierto empleado di e empresanan chines manera Huawei, kual ta kompartí dato ku China kual ta un violashon di derechi humano i abusu”, asina Pompeo a bisa den un rueda di prensa. E departamento a bisa ku tur empresa ku hasi negoshi ku Huawei “ta hasiendo negoshi ku abusadónan di derechi humano”.
Reino Uni tambe a anunsiá ku lo ekskluí Huawei di e desaroyo di 5G den e pais. Pompeo a elogiá e desishon di e promé minister britániko Boris Johnson, pero a ninga ku esaki ta dor di preshon di Merka.
