CIUDAD DE GUATEMALA, GUATEMALA (AFP).- Por lo ménos 18 persona, entre nan dies mucha, a disparsé ora ku riu a krese pa motibu di fuerte áwaseru, ku ademas a afektá seis bibienda den sentro di kapital di Guatemala.
Segun e entidat di protekshon sivil, “e kresementu di riu a lastra vários kas dje pueblo Dios es Fiel, ubiká bou dje brùg El Naranjo, kaminda e riu ta kore.
Segun e bosero dje grupo kordinadó di desaster (ConRed), te na momento di duna deklarashon tabatin 18 hende ku a disparsé i seis kas a sufri dañonan severo.
Gran parti dje bibiendanan dje kapital ta manda nan awa shushi den e riu, djis pegá kaminda tin míles di habitante pober ku a lanta nan konstrukshonnan apesar ku esei ta prohibí pa outoridatnan.
E insidente a tuma lugá djaluna mardugá despues di hopi áwaseru ku a kai e dia anterior. E koriente dje awa, ku a lastra kantidat grandi di piedra i tera, a afektá vários kas, konstruí den nan mayoria ku plachinan di zink.
E lugá ku a keda devastá pa e forsa dje koriente di awa awor a keda ku solamente piedranan grandi, segun un periodista a duna di konosé.
