MOSCOW, AP.- E preshon riba Moscow pa e venenamentu di un eks agente ruso na Gran Bretaña a oumentá djárason, debí ku mas diplomátiko ruso a wòrdu ekspulsá òf mandá pa estranhero despues di wòrdu retirá.
Rusia ta bisa ku lo rospondé na medidanan kontra su diplomátikonan, pero un funshonario haltu a bisa ku no tin purá pa tuma represaya. Ademas, Rusia ta rechasá e akusashon di Gran Bretaña, indikando ku e tabata tras di e atake kontra Sergei Skripal i su yu den e siudat di Salisbury dia 4 di mart. Ambos ainda ta den kondishon kritiko.
Skripal tabata enkarselá na Rusia promé ku el a wòrdu mandá pa Gran Bretaña na 2010.
Mas di 20 pais a anunsiá e ekspulshon di mas di 150 diplomátiko ruso, inkluyendo 60 di Merka. Gran Bretaña a ekspulsá 23 i Rusia a kontestá sakando e mesun kantidat di diplomátikonan, pero no a rospondé na otro medidanan.
Djárason, Montenegro a anunsiá ku lo ekspulsá un diplomátiko ruso. Slovakia i Malta a bisa ku lo retirá embahadornan di Rusia.
E vise minister di Relashon Eksterior di Rusia Sergei Ryabkov a bisa ku Moscow “no tin purá” pa tuma represaya. El a agregá na e agensia estatal RIA Novosti ku Rusia ta konsiderando su kontestanan “hopi bon i ku hopi kuidou”.
E agensia di notisia Interfaxa reportá ku Ryabkov a bisa ku e ekspulshonnan a wòrdu dirigí pa London i Washington.
