WILLEMSTAD.- E picheo di Philadelphia Phillies kada bes na momento krusial tabata saka e outnan i Phillies a logra un viktoria di 4-2 riba San Diego Padres. Phillies a bai dilanti 2-1 den e seri final ‘best of seven’ dje liga. Nota ménos bon ayera ta e ekspulshon di Jurickson Profar kende a reakshoná na un manera no korekto ora ku el a keda ponchá den bòm di nuebe.
Tabata un lansamentu dje closer Seranthony Dominguez ku Profar a laga pasa komo di kuater bola. El a tira su bate kaba pa bai primera, ora ku umpire di tersera a dekretá ku su bate a pasa. Profar a rabia, skòp tera i a fulminá kontra dje umpire di tersera, loke a kous’é su ekspulshon. Seguidamente e dos siguiente bateadónan a kome ponche pa kaba wega.
Phillies tabatin 4 kareda, 9 hit i 2 eror miéntras ku Padres a skor dos biaha, bati shete i i a hunga ku defensa limpi.
Awe nochi 7:45 or lo tin wega number tres dje seri, siguí mayan atardi pa 2:37 or ku e di kuater partido.
