CHAMAN, PAKISTAN (AP).- E promé trùknan ku suministronan pa e trupanan di Merka i otro paisnan di OTAN ku a krusa Pakistan di sùit pa nort, finalmente a drenta Afganistan ayera, despues ku e rutanan ei di suministro a keda será durante shete luna.
Pakistan a sera e rutanan den represaya pa e atakenan aéreo merikano di novèmber, ku a mata 24 sòldá di frontera. Islamabad djamars a disidí bolbe habri nan, despues ku Merka a pidi diskulpa pa e mortonan. E diskulpa a aliviá e tenshonnan bilateral parsialmente. E merikanonan a bisa ku nan no a ataká e forsanan pakistani intenshonalmente, pero Pakistan a rechasá esplikashoniaeksigí diskulpanan formal.
Merka ainda tin un relashon tenso ku Pakistan, un pais ku e ta konsiderá krusial pa su plannan militar na Afganistan.
Washington ta akusá Islamabad di ta respaldá e milisianonan taliban ku ta ataká sòldánan merikano despues di a krusa e bisiña Afganistan. E atakenan merikano ku avionnan no tripulá kontra e zonanan na frontera, a pone e pakistaninan rabia.
E republikanonan, rabiá pa e hecho ku e gobièrnu a ofresé diskulpa na un pais ku supuestamente ta duna refugio na milisianonan ku ta ataká e trupanan merikano, a kritiká presidente Barack Obama, durante di e kampaña pa e reelekshon.
