BAGDAD (AP).- Irak tin ‘informashonnan sólido’ ku milisianonan di al-Qaida ta infiltrá den Siria for di Irak pa lansa atakenan, asina e kansier irakí Hoshyar Zebari a afirmá ayera, i el a atvertí ku e violensia lo por sakudí e region. Zebari a bisa ku durante añanan Irak a pidi Siria pa para e movementu di kombatientenan sunita ku a filtra di Siria den Irak pa yuda e rebeldenan.
Zebari a atribuí un resiente brote di violensia na Irak na e krísis polítiko di lunanan ku a afektá e nashon. E milisianonan a lansa atakenan por lo ménos kada tres dia for di kuminsamentu di yüni, ku un saldo di kasi 300 morto. Entre e blankonan prinsipal tin e peregrinonan shiita, e forsanan di seguridat i funshonarionan di gobièrnu, kendenan e rebeldenan sunita vinkulá ku al-Qaida ta ataká pa destabilisá e gobièrnu i kousa represayanan entre e komunidatnan shiita i sunita.
Ayera, eksploshonnan den e siudatnan di Bagdad i Mosul a mata seis persona i a heridá 17 mas.
Polis a bisa ku un bòm den e kas di un funshonario irakí a mata su kasá i dos yu muhé den e kapital. Un funshonario di rango haltu di e gobièrnu munisipal, Ali Abdul-Amir, shiita, a resultá heridá huntu ku su dos yunan den un atake den e bario Ghazaliya, di mayoria sunita.
Na Mosul, un atakante suisido a detoná su eksplosivonan dilanti di un barberia ku polisnan i sòldánan ta frekuentá.
Outoridatnan a bisa ku tabatin tres morto i dieskuater persona heridá.