LA PAZ, BOLIVIA, AP.- Míles di universitario a Sali pa protesta djaluna den shete di e dies siudatnan mas grandi na Bolivia, pa eksihí hustisia pa morto di un studiante siman pasá durante un manifestashon i eksigí gobièrnu pa duna un oumento den e presupuesto di universidatnan públiko.
e protesta a derivá di atakenan ku polis den siudat di Cochabamba, den sentro di e pais, pero outoridat no a reportá e kantidat di personanan detené ni herida mesora.
Den La Paz, e marcha tabata pasífiko pero multitudinario i a tuma lugá dilanti di Ministerio di Ekonomia. No tabatin polisnan riba kaya, pero solamente esnan ku tabata vigilá e edifisio di Ministerio.
Jonathan Quispe a muri djaweps último durante un protesta riba kaya den e siudat El Alto pa e impakto di un kanika tirá pa e manifestantenan mes, segun Minister di Gobièrnu Carlos Romero.
Sinembargo, outoridat universitario a rechasá e vershon aki i ta kulpa polis di a provoká e morto. “E gobièrnu ta responsabel i nan ta kalumniando nos. Nos ta eksihí hustisia. Polis ta reprimiendo e protesta manera na Venezuela”, asina e viserektor a bisa den un konferensia di prensa di Universidat Públiko El Alto.
E minister di Ekonomia Mario Guillen a organisá un diálogo ku outoridat di 15 universidat públiko kaminda 440.000 studiante ta bishita.
