FRANKFURT, ALEMANIA, AP.- E eks gobernante katalan Carles Puigdemont a bisa den un entrevista desde un prizòn na Alemania ku e no ta “un kriminal” i ku e kampaña di independensia di e region spañó ta basá riba demokrasia i no violensia.
Despues di a wòrdu bishitá pa dos parlamentario aleman, Puigdemont a bisa: “nos no ta delinkuente, nos a gana elekshon dos biaha”.
E katalan ta detené den Alemania debí na un òrdu di aresto europeo. Spaña ta akusá e polítiko di 55 aña di organisá un referèndem sekshonista no outorisá. Outoridat aleman ta konsiderando un pedido di ekstradishon presentá pa Madrid.
Puigdemont a bisa ku “e delito di rebelion ta demandá e uso di violensia i no tin violensia, pues no tin rebelion”.
E grabashon di e bishita di djadumingu a wòrdu publiká djaluna pa e wepsait aleman di notisia weltnetz.de.
