Pendiente solushon duradero pa ENNIA…
WILLEMSTAD.- Pa mas tardá awe 10 òktober Kòrsou i St. Maarten mester firma e akuerdonan di refinansiamentu di debe di Corona. Sekretario di estado, Alexandra van Huffelen a pidi e paisnan pa manda e akuerdo firmá bèk pa su persona pa mas tardá awe 10 òktober. E akuerdo tin durashon di 1 aña.
Awe e debenan di Corona ta madurá. Pa Kòrsou esei ta nifiká ku mester paga mas ku 900 mion florin bèk despues ku gobièrnu a fia e suma aki komo sosten di likides durante e pandemia di Corona. Pero Hulanda a ofresé pa refinansiá e debe aki ku un fiansa riba término largu largu i interes abou, basta ku Kòrsou i St. Maarten yega na un akuerdo riba un solushon duradero pa kompania di seguro ENNIA Caribe Leven despues ku e kompania a kai den problema ku solvabilidat i entrante 2024 no por garantisá pago di penshun di su klientenan.
Pero Konseho di Minister di Kòrsou den su reunion di 5 òktober último a disidí pa no aseptá e oferta di Hulanda pa fia 660 mion euro pa garantisá e “doorstart” di ENNIA i komo tal no a logra yega ainda na un solushon duradero pa ENNIA manera Hulanda ta pidi pe. “E desishon na último momento di parti gobièrnu di Kòrsou pa no aseptá e fiansa di 660 mion euro di parti Hulanda pa yega na un “doorstart” di ENNIA Caribe Leven ta hopi fèrfelu pa St. Maarten pasobra e un solushon sólido i duradero pa ENNIA tabata kondishon di Hulanda pa refinansiamentu di e debe di Corona riba término largu kontra un interes abou. Mirando ku ainda no tin un akuerdo riba ENNIA Hulanda no por ofresé kondishonnan faborabel pa refinansiá e debe di Corona”, sekretario di estado Alexandra van Huffelen a informá Tweede Kamer di Hulanda den un karta.
Na lugá di esaki, Van Huffelen ta sigui bisa den su karta ku el a ofresé ámbos pais re-finansiamentu pa un periodo di 1 aña. Pa Kòrsou esaki ta konforme e oferta di 15 mei, esta kontra un interes di 5,1 porshento, den kaso ku no yega na un solushon duradero pa ENNIA. Pa St. Maarten ku a duna di konosé eksplísitamente ku nan tabata dispuesto pa firma e akuerdo pa un “doorstart” di ENNIA, Hulanda a kambia su oferta i ta a ofresé un tasa di interes di 3,4 porshento.
E echo ku al final no a yega na un akuerdo no ta falta di St. Maarten i komo tal gabinete Hulandes a disidí ku no por perhudiká St. Maarten debí na un kambio den desishon di gobièrnu di Kòrsou.
Pa tantu Kòrsou komo St. Maarten ta konta ku ainda por kambia e kondishonnan di e refinansiamentu i hasi esaki unu riba término largu, asina ku segun evaluashon di Hulanda tin un akuerdo duradero riba mesa pa yega na terminashon kontrolá di ENNIA.