WASHINGTON, AP.- Partido Republikano tabatin problema pa uni ku “no” durante ocho aña di gobièrnu di demókrata Barack Obama, pero awor esaki tin difikultat kresiente pa rospondé ku “si” den e promé simannan di Donald Trump su era.
E frakaso apsoluto ku e proyekto di lei di e Partido Republikano a sufri pa remplasá seguro di salú ku Obama a laga, mihó konosí komo Obamacare, a mustra kon e republikanonan ta dividí entre esnan konservador i esnan demókrata.
Apesar di su monopolio na Washington, e republikanonan mester enfrentá otro i tin problema pa haña un forma di goberná.
E divishonnan aki a kosta e partido su oportunidat mas grandi di kumpli ku un promesa di shete aña pa deshasí di e Lei di Kuido di Salu Asekibel di Obama.
Esaki a laga duda si Kongreso, dirigí pa Partido Republikano por ta kapas di resolvé desde tareanan monumental te na esnan básiko. Gobièrnu mester mantené habrí na final di proksimo luna, oumentá outoridat di debe di e pais na final di e aña aki i aprobá 12 proyekto di lei presupuesto pa e agensianan i departamentonan federal.
Ounke e bloke a oponé kontra e sistema establesé, esaki a yuda republikanonan pa gana mayoria den Kongreso den 2010 i 2014. E divishon interno ta un menasa pa e kapasidat di Partido Republikano pa kumpli ku otro promesanan.
