SANTIAGO DE CHILE, AP.- Seis persona a muri i 40 a resultá herida djaluna mainta despues ku un bus rumbo pa sùit di Chile a bòltu, segun informashon di un gobernador regional.
E aksidente a keda registrá despues di meianochi riba Ruta 5, 60 kilometer na sùit di Santiago, na momentu ku e bus tabata dirigiendo pa Temuco.
E bus tabatin 51 pasahero di kual seis a muri. Sinku muhé i un hòmber a muri i 40 a keda herida, segun e gobernador regional di O’Higgins, Juan Masferrer.
Un pasahero a bisa ku e shofùr a duna atvertensia ku un tayer a eksplotá, promé ku el a pèrdè kontrol di esaki.
Ministerio di Transporte a saka dos bus di e mesun kompania for di rotashon dor ku e shofùrnan tabata manehá ku pèrmit falsu.
