WASHINGTON, AP.- Mayoria studiante ku a kometé un atake tabata hóbennan ku a wòrdu tentá, ku problema disiplinario i ku komportashon alarmante ku generalmente ta wòrdu ignorá, segun un estudio di Servisio Sekreto di Merka.
Den por lo ménos kuater kaso, e atakante kier a imitá otro hóbennan atakante manera esnan di Columbine High School na Colorado, Virginia Tech University i Sandy Hook Elementary School.
E estudio di e Sentro Nashonal di Evaluashon di Menasa ta e informe mas kompleto emití desde e bashamentu di bala na Columbine na aña 1999. E informe a analisá 41 atake desde 2008 pa 2017 i e investigadónan tabatin akseso sin presedente na informashon konfidensial di organismonan di seguridat, inkluyendo archivonan polisial i dokumentonan ku no ta na disposishon di e públiko.
E konklushonnan por yuda sentronan di estudio i outoridat identifiká e studiantenan ku posiblemente ta planiando un atake i evitá ku esaki ta tuma lugá.
Servisio Sekreto ta na enkargo di protehá e presidente, pero tin koperashon di e Sentro di Evaluashon di Menasa pa analisá kon pa prevení otro tipo di atake tambe.
Desde e atake di Columbine tabatin diferente episodio similar. Algun atake manera esun di Sandy Hook na aña 2012, a wòrdu kousá pa hóbennan ku no tabata un studiante di e skol en kuestion.
