HONG KONG, AP.- E siklon tropikal Mangkhut a asotá sùit di China i a provoká dos morto djadumingu despues di asotá nort di Filipina ku bientu fuerte i áwaseru ku a laga por lo ménos 66 morto.
Mas di 2,4 mion persona a wòrdu evakuá den provinsia di Guangdong, na sùit di China, pa djadumingu atardi pa hui di e siklon tropikal. Kasi 50.000 boto di peska mester a regresá nan puestonan, segun informashon di medionan estatal.
Diessinku persona a resultá heridá den pueblo di Macau, kual a sera su kasinonan pa promé biaha. Opservatorio di Hong Kong a atvertí e pueblo pa no bishitá Bahia Viktoria, kaminda laman tabata brutu i olanan tabata haltu.
Un video publiká riba internèt ta mustra e momentu kaminda e parti di un edifisio na Hong Kong ta basha den otro, miéntras ku un otro edifisio di vários piso tabata lèn kasi pa kolèps.
E korant a indiká ku e áwaseru fuerte a provoká olanan haltu di 3 meter haltu alrededor di Hong Kong.
Mangkhut a mishi ku tera den siudat di Taishan, den provinsia di Guangdong, 5 or di atardi ku bientu máksimo di 162 kilometer pa ora.
Outoridat na sùit di China a emití un alerta kòrá na momentu ku servisio meteorológiko nashonal a bisa ku e region hopi poblá lo enfrentá “un prueba fuerte kontra bientu i áwaseru” i a pidi funshonarionan pa prepará pa posibel desasternan.
