Situashon kaótiko na Venezuela kousando atakenan estilo pirata den laman Karibe

CARACAS.- Laman Karibe ta eksperensiando un fenómeno ku pa hopi dékada a disparsé for di e área aki. Un investigashon di e instituto Oceans Beyond Piracy ta atvertí doñonan di yatenan di luho pa pirateria den sur di laman Karibe. Ta e situashon ekonómiko na Venezuela ta poniendo ku e poblashon piskadó di Venezuela ta kuminsá kometé aktonan kriminal pa nan por sobrebibí.
E investigashon ku a konsentrá riba sifranan di aña pasá ta mustra ku tabatin 71 kaso den e region kompará ku 21 e aña anterior, asina The Telegraph ta informá. E mayoria di e atakenan a tuma lugá for di e kosta di Venezuela. E pais latinoamerikano ta konfrontando un situashon polítiko hopi turbulento ku ta kousando un kresementu di inflashon nunka bisto.
E piskadónan venezolano ku dia pa dia ta den un situashon di mas pobresa ta partisipá den trafikashon di droga i asta ladronisia riba laman. E situashon aki ta paresido na Somalia unda piskadónan a legumai atendé ku piskamentu i awor ta konsentrá riba ladronisia di barkunan ku pasa den nan serkania. E inflashon astronómiko kousa pa Hugo Chavez i despues Nicolaas Maduro kombiná ku akshonnan di nashonalisashon di empresanan den e pais a hasi e pobresa mas pió ku nunka. Piskadónan di Sucre awendia ta trafiká ku kontrabanda di bruki pa yu for di Trinidad. Algun luna pasa a tuma lugá un atake basta serio riba laman kaminda por lo ménos 12 persona a pèrdè nan bida.
Riba laman tin un kódigo no skibi di fraternidat, pero Venezuela su piskadónan ta birando pió ku esnan di Somalia i ta ataka otro piskadónan pa nan por haña kuminda i otro nesesidatnan.