MADRID, SPAÑA, AFP, AP.- E kantidat di morto pa COVID-19 na Spaña a pasa 10.000 djaweps despues di a registrá 950 morto den 24 ora. E kantidat di kaso di infekshon konfirmá a surpasá 110.000 víktima.
E pais a indiká di tin plania di sigui tur telefòn selular pa lokalisá moveshon durante e lockdown pa kombatí e propagashon di COVID-19. Aparte di esaki, botikario i enfermeronan a pidi e gobièrnu pa proveé materialnan di protekshon pa prevení ku e malesa ta plama.
E gobièrnu kier usa e lokalisashon di moveshon aki pa mira kon e lockdown ta wòrdu respetá. E intenshon ta pa analisá ki efekto e medidanan tabatin riba e hendenan su moveshon, i determiná si esaki a baha òf subi, asina e gobièrnu a informá.
E gobièrnu ta garantisá ku e data ku e ta risibí di operadornan nashonal lo eliminá tur informashon personal i lo ta kompletamente anónimo, konforme e pais su leinan di privasidat.
Spaña, un nashon ku 47 mion residente, a imponé un lockdown nashonal riba 14 di mart pa kombatí e propagashon di coronavírus. E pueblo a haña pèrmit solamente pa traha, kumpra kuminda i buska yudansa médiko i tambe pa kana ku kachó pafó. E restrikshonnan a wòrdu amplia riba 30 di mart, despues ku gobièrnu a pidi tur trahadó no esensial pa keda kas.
