PORT SUDAN, SUDAN (AFP).- Krísis ta sigui multipliká den Sudan. E pais, batí pa un guera di mas ku un aña kaba entre generalnan rival i pa efektonan di kambio di klima, awor ta enfrentá eskases di awa.
“For di inisio dje guera (den aprel di 2023), dos di mi yunan ta kana 14 kilometer tur dia pa bai buska awa”, segun Issa, tata di famia na Nort Darfur, kaminda 65.000 habitante di Sortoni a bai biba pa skapa di konfliktonan.
E pais ku un infrastruktura dañá pa dékadanan di konflikto, ta sufri e konsekuensia di kambio di klima, di bes enkuando ku áwaseru torensial i ola di kalor manera fièrnu, ku tèrmometer ku ta subi te na 50 ºC.
Dia 15 di aprel di 2023, na momento ku e guera a kuminsá entre ehérsito sudanes i e paramilitarnan Forsanan di Apoyo Rápido, diplomátiko i trahadónan humanitario a bandoná e pais. Ku esei a bin un stòp na e yudansa di esnan mas vulnerabel.
Den kaso di Sortoni, tabata e organisashon humanitario italiano enkargá ku stashonnan di awa pa bebe, ku a sali for di e pais. Ta bini aserka ku Nashonnan Uní a atvertí riba e situashon di kantidat masha grandi di habitante ku ta kana komo 50 minüt pa por haña awa, poniendo nan bida na peliger.
Na Shaqra, nan ta traha fila di 300 meter pa por haña awa pa bebe.
Den 2023, fuerte áwaseru, siguí pa inundashonnan, a afektá 89.000 persona. Hopi hende a muri na e okashon ei i pa kolmo no por usa e awa debí ku no tin sistema di fangu i warda e awa. E sistemanan bou di tera pa fangu awa no ta funshoná pa motibu di problema ku e motornan, ademas ku ta difísil pa mantené nan pa motibu dje guera i e eskases di kombustibel komo tambe piesa.
