JOHANNESBURG, SURÁFRIKA, AFP.- E presidente surafrikano, Cyril Ramaphosa, a anunsiá un “plan enorme” di sosten ekonómiko i sosial ku un balor di 500.000 mion rand (26.500 mion dòler). E plan ta pa yuda tur empresa i persona vulnerabel den e pandemia di coronavirus.
Ramaphosa a deklará den un diskurso na televishon ku e montante ta representá 10% di e Produkto Interno Bruto di e pais. “E impakto di coronavirus mester di un presupuesto ekstraordinario”, asina el a indiká.
Di e 500.000 mion rand, 130.000 mion ta destiná pa e presupuesto aktual, di kual tur prioridat a wòrdu revisá. E 370.000 mion rand ku a sobra lo bini di “sosionan internashonal i institushonnan finansiero internashonal”. Un total di 50.000 mion rand ta destiná pa e klase vulnerabel ku mester di supsidio sosial durante 6 luna largu.
Suráfrika a drenta den reseshon na fin di 2019, promé ku e pandemia a kuminsá. Esaki ta e pais mas afektá pa COVID-19 na Afrika, ku 3.465 kaso konfirmá, inkluyendo 58 morto.
