VIRGINIA (AP).- Awaserunan fuerte generá dor di tormenta tropikal Alberto a kousa inundashon na Virginia. Esaki a laba brùgnan bai kuné, kousa daño na kasnan, sera skolnan i transformá un aria ku normalmente ta trankil den un riu furioso ku a ranka outonan bai kuné ku hende ainda aden. A lo ménos un persona a pèrdè su bida, miéntras ku personal di reskate tabata en buska di otronan.
Tabatin gruponan di reskate ku tabata buska den e aria di Ivy Creek i nan a bin topa ku kurpa di un dje dos okupantenan di un outo Toyota Prius ku e awanan a laba bai kuné den nan outo, esei di akuerdo ku polis. A sigui buska e di dos persona te lat ayera pero sin éksito. Polis a duna di konosé ku ta trata aki di un hende muhé.
E tormenta aki a sòru pa morto di por lo ménos kuater hende kaba na Merka na prinsipio dje siman aki. Pero e servisio meteorológiko a duna di konosé ku potensialmente lo bai tin mas yobida i inundashon, pero ku esaki lo sigui pa e parti zùitost di Ohio Valley mas den fin di siman.
