BOGOTA, AP.- E minister di defensa kolombiano a informá djabièrnè ku tres persona a muri na sùitwèst di e pais durante algun disturbio ku a surgi komo kousa di un wèlga nashonal. E paro a inkluí un marcha kaminda mas di 250.000 studiante, trahadó i sindikalista a partisipá pa rechasá e medidanan ekonómiko di gobièrnu.
Carlos Holmes Trujillo a señalá den un rueda di prensa ku “Outoridat a konfirmá morto di dos persona den siudat Buenaventura i unu mas na Candelaria. Tur dos ta munisipio di Valle”.
Obrero i empleadonan di Bogotá a limpia Plaza Bolívar i alrededor di esaki. Tabatin vários echo di violensia den zona Suba, na nortost di e kapital, kaminda a destruí vários stashon di transporte públiko i un stashon di polis. Algun manifestante a kima un motersaikel tambe na kandela.
Gobièrnu lokal di Cali a deklará un toke de keda te ku djabièrnè mardugá dor di vários problema ku òrdu públiko.
“Nos ta rechasá tur akto di violensia enfátikamente i kategorikamente despues di e mobilisashonnan. Nos a organisá un paro di un dia i e pueblo kolombiano a obedesé e yamada aki”, asina Diogenes Orjuela a bisa, kende ta presidente di Sentral Unitario di Trahadó.
E direktor di polis, general Oscar Atehortua, a informá ku mas di 150 polis di Bogotá i Cali a resultá heridá. A detené 98 persona, entre nan ocho menor di edat. Polis a intervení na 622 okashoná pa habri kaminda i kita barikada. 122 sivil a resultá afektá spesialmente pa gas lakrimógeno.
