BUENOS AIRES, AP.- Presidente Donald Trump a anunsiá djaweps ku a kanselá un reunion programa ku presidente ruso Vladimir Putin, debí ku Rusia a konfiská barkunan ukraniano.
Prensa ruso a informá ku Kremlin no a wòrdu notifiká di e kanselashon aki.
Trump a bisa: “debí ku Rusia no a regresá e botonan i marineronan pa Ukrania, mi a disidí ku ta mas mihó pa kanselá e enkuentro plania ku presidente Vladimir Putin na Argentina. Mi ta spera un enkuentro pronto, na momentu ku e situashon wòrdu resolvé”.
Rusia a konfiská tres boto ukraniano i a detené esaki su tripulashon. Moscow a bisa ku Kiev no tabatin pèrmit pa pasa entre su teritorio kontinental i e península di Crimea. Ukrania ta insistí ku su botonan a kumpli ku leinan marítimo internashonal.
E bosero di Kas Blanku, Sarah Huckabee Sanders, a informá ku Trump lo no tene un reunion formal ku e lidernan di Turkia i Surkorea tampoko. E lo papia ku nan informalmente den e kumbre na Buenos Aires.
Sanders a agregá ku Trump a tuma e desishon pa modifiká e enkuentro ku presidente turko Recep Tayyip Erdogan i surkoreano Moon Jae-in despues di konsulta ku e sekretario di Estado, Mike Pompeo, i e asesor di seguridat di Kas Blanku, John Bolton.
