WASHINGTON, AP.- Presidente Donald Trump lo yama e famianan di sòldánan ku a muri e luna aki na Niger, asina Kas Blanku a anunsiá, miéntras tabata oumentando e krítikanan kontra e mandatario debí ku el a afirmá ku su antesesornan no a honrá debidamente militarnan ku a muri den kombate.
Ayera djamars den un entrevista na radio Trump a bisa ku e tempu ei presidente Barack Obama no a yama ni John Kelly e aktual sekretario general di Kas Blanku ora su yu a muri na Afghanistan na 2010.
“Mi ta kere ku mi a yama tur famia di e sòldánan ku a muri”, asina Trump a bisa den entrevista ku Brian Kilmeade di Fox News Radio. :”Pa loke ta mi antesesornan mi no sa. Obama a yama e general Kelly?”.
Un funshonario di Kas Blanku a bisa ku Obama no a yama Kelly na telefòn pero mesora no a kontesta e pregunta ku si e presidente e tempu ei a manda su palabranan di pésame di otro forma.
Un eks bosero di Obama Ned Price a reakshoná riba Twitter bisando “Kelly, un hòmber di honor i integridat mester apstené su mes di e krueldat ridíkulo ei”, asina Price a tuit. El a wak hopi di aserka kon Obama a sinti doló pa famianan di e sòldánan ku a muri.
Den un konferensia di prensa Trump a bisa di a manda karta pa famianan di kuater sòldá morto dia 4 di òktober na Niger i ku e tin intenshon di yama nan, indikando mas aleu ku e ta preokupá pa honrá esakinan debidamente. El a bisa ku e presidentenan promé kuné no tabata yama, kisas Obama a yama algun biaha pero otro presidentenan no a hasié.
