PALM BEACH, FLORIDA, MERKA, AP.- Presidente Donald Trump a bisa djabièrnè ku lo no tin protekshon pa e hóbennan ku a yega Merka desde mucha, trese ilegalmente pa nan mayornan, si e fondo pa un muraya na frontera no wòrdu outorisá.
Trump a tweet djabièrnè: “Nos a bisa e demókratanan, ku no por tin DACA sin MURAYA ku ta hopi nesesario na Frontera Sùit”.
El a agregá ku “nos mester protehá nos pais sin importá nada”.
E bataya pa inmigrashon ta wòrdu atendé te otro aña. E demókratanan kier protekshon pa e ‘dreamers’, benefisiarionan di DACA.
Ademas, Trump kier un sistema di inmigrashon basa riba mérito mas ku simplemente laso familiar i pa eliminá e loteria di inmigrashon, ku ta benefisiá 50.000 solisitante pa residensia di diferente pais no benefisiá pa otro programanan.
