WASHINGTON, AP.-Presidente Donald Trump a bolbe tweet furiosamente djaluna riba e tema migratorio, yamando Kongreso pa aprobá leinan di seguridat na frontera “usando e opshon nuklear si esaki ta nesesario”.
E mandatario a tweet ku ta nesesario pa konstruí un muraya na frontera ku Mexico i ku “e demókratanan kier mantené frontera habrí i por lo tantu nan kier droga i delinkuensia”. El a afirmá ku e akuerdo pa yuda e inmigrantenan yamá “dreamers” ta “morto pasó nan no ta interesá e demókratanan i no a aktua”.
Anteriormente, Trump a pidi pa usa e “opshon nuklear”, pues, alterá e reglanan di Senado di tal manera ku lo impedí ku e partido minoritario por stroba un votashon. Pero den pasado, e lider di mayoria republikano den Senado, Mitch McConnel, a ninga di hasi esaki, señalando ku un dia e republikanonan lo ta minoria atrobe.
Kas Blanku no a rospondé djaluna riba pregunta di Trump su tweetnan. E presupuesto aprobá algun dia pasá ta kontené 1.600 mion dòler pa e muraya na frontera, pero gran parti di esaki ta pa drecha segmentonan ku ya ta eksistí, ademas esaki ta inkluí restrikshonnan tokante e tipo di muraya ku por wòrdu konstruí.
