WILLEMSTAD.- Tula Lives! Un konsierto presentá pa Izaline Calister, Thijs Borsten i Royston Hato, kaminda por sinti kon bida na Kòrsou tabata ántes. Un konsierto pa selebrá Tula, kual te dia di awe ta biba den nos músika, nos hendenan, den nos historia i nos diversidat kolorido.
Tula tabata un katibu riba e plantashon Kenepa. E i su kompañeronan katibu tabata traha dianan largu bou di kandela i tabata haña tiki di kome. Na aña 1975, e katibunan a haña ta basta i a bisa nan shon ku nan no kier traha mas pe i ku nan ke libertat. Tula tabata kere ku tur hende na Kòrsou tin derechi riba libertat i ku sklabitut mester ser abolí. Ku kurashi, Tula a tuma liderazgo den e revolushon di mas grandi pa derechi di libertat i igualdat den historia di nos isla.
E akto aki a marka e komienso di lucha pa libertat na Kòrsou. Na aña 2010, Tula a ser deklará komo e héroe nashonal di Kòrsou i na 2023 el a keda ofisialmente honrá i rekonosí komo e héroe di resistensia den Reino.
Tula Lives! lo ser presentá dia 6 di aprel na Movies Punda 7.00 PM. Entrada ta Naf. 65,- i lo por kumpra esaki na Movies Punda i Movies Otrobanda.
Atardi musikal
Djasabra 6 i djadumingu 7 di aprel, Izaline Calister ta invitá pueblo di Kòrsou pa bin disfrutá di un atardi musikal. Un konsierto di kanto di kuenta pa mucha “Bondia, Goeiemorgen”.
“Bondia, Goeiemorgen”
E presentashon musikal pa mucha ta tuma lugá djadumingu 7 di aprel 16.00 PM na Movies Punda, ku un kolekshon di kantikanan di mucha pa muchanan di Kòrsou, Aruba i Boneiru. Karchi ta optenibel na Mensings Caminada, The Movies òf via www.tibbaa.com
