SAN FRANSISCO, MERKA, AFP.- Twitter ta demandá Elon Musk pa inkumplimentu di un kontrakt pa kumpra e kompania na balor di 44.000 mion dòler bisando ku su strategia ta unu di “hipokresia”, segun dokumentonan hudisial.
E demanda presentá den estado di Delaware ta pidi korte pa duna Musk òrdu pa kompletá su akuerdo di kompra di Twitter, argumentando ku niun indemnisashon ekonómiko por drecha e daño kousá na e kompania.
Despues di vários siman di menasa, Musk a retirá e oferta di kompra fin di siman pasá, akusando Twitter di hasi deklarashonnan “engañoso” tokante e kantidat di kuentanan falsu, segun un karta di abogadonan entregá na reguladornan di e merkado merikano.
E kanselashon di e akuerdo di kompra, ku Musk a firma den aprel ta forma e base pa un bataya hudisial largu ku Twitter, ku na promé instante a ninga di bende e kompania na e empresario.
