BUCAREST, AP.- Outoridat di Union Europeo ta trahando ku Gran Bretaña pa yuda promé minister Theresa May i evitá ku e pais ta sali di e bloke sin un pakto. Apesar di esaki, e lider a insistí ku lo no bolbe negoshá e akuerdo di separashon.
E presidente di Komishon Europeo, Jean-Claude Juncker a bisa ku “nos ta revisá e aklarashonnan ku Downing Street ta rekerí” ku por yuda May ku Parlamento britániko ta aprobá e akuerdo di Brexit otro siman.
Sinembargo, Juncker a agregá: “Esaki no mester wòrdu konfundí komo un re-negosiashon”.
Un funshonario di UE a bisa ku e bloke i gobièrnu britániko ta “den kontakto pa asina sigurá e pakto su aprobashon. E funshonario a papia ku kondishon pa keda anónimo.
E akuerdo entre Gran Bretaña i Union Europeo a wòrdu logra den novèmber 2018, pero el a wòrdu rechasá pa Parlamento Britániko. May a posponé e votamentu di desèmber pa evitá un derota kontundente pero no tin indikashon ku e pakto a logra haña mas sosten desde e dia ei.
Si e pais no yega na un akuerdo, Gran Bretaña lo mester sali di forma abrupto riba 29 di mart. Esaki por kousa insidentenan kaótiko na frontera, puerto i aeropuertonan.
