WARSAW, POLONIA, AFP.- Polonia ta boga pa atmishon di Ukrania den NATO, durante di un kumbre den yüli. E pais ta den guera ku Rusia, kual a akusá paisnan oksidental di empeorá e konflikto i ta impliká den atentadonan riba su teritorio.
“Nos ta purbando di haña garantianan di seguridat adishonal pa Ukrania pa reforsá su potensial militar, ku ta reforsá e sintimentu di seguridat di e pueblo ukraniano”, asina e presidente polako, Andrzej Duda a bisa despues ku el a risibí e presidente ukraniano Volodymyr Zelensky.
Duda a bisa ku e ta kere firmemente ku lo haña e garantianan pa Ukrania drenta NATO.
Polonia ta sostené e kandidatura di Kiev firmemente.
Rusia a invadí Ukrania den febrüari 2022, eksihiendo garantia ku nunka e pais lo drenta NATO.
Zelensky a gradisí Polonia su sosten na esfuersonan di Ukrania pa drenta tantu Union Europeo komo NATO.
