BRUSELAS, AP.- Dirigentenan i parlamentarionan di Union Europeo a ekspresá nan sosten na e gobièrnu sentral di Spaña i a kritiká outoridat di Catalonia pa realisá un referèndem riba independensia ku a hinka e pais den un krísis polítiko.
Frans Timmermans, visepresidente di Komishon Europeo, tabata e bos prinsipal di krítika kontra e konsulta ku a degenerá den violensia. E no a menshoná e 900 personanan ku a resultá lástima pa akshonnan polisial pa frustra e votashon.
Vários a pidi un diálogo entre gobièrnu sentral di Madrid i outoridat di Catalonia, pero a distansiá di e idea ku e bloke por sirbi komo mediadó, apesar di e pedidonan di Catalonia.
“Tin un konsenso generalisá ku gobièrnu regional di Cataloia a disidí pa ignorá lei”, asina Timmermans a bisa den Parlamento Europeo den Strasbourg na Fransia.
Rèspèt pa estado di derechi no ta opshonal, e ta fundamental”, asina el a ekspresá. “Niun hende no por ignorá leinan”.
No ta tur parlamentario ta sostené e posishon ofisial. Un bandera di Catalonia a wòrdu hisá pa algun representante te ora esaki a wòrdu bahá riba pedido di un legislador spañó.
Timmermans a pidi e partinan den konflikto pa kuminsá e negosiashonnan.
