SIUDAT DI VATIKANO, AP.- Un delegashon ku ta representá e lider opositor venezolano, Juan Guaidó, a reuní ku funshonarionan Vatikano miéntras Santa Sede ta evaluá petishon di presidente Nicolás Maduro, pa intervení den e krísis polítiko den e pais.
Vatikano no a bisa ken a partisipá. E Sekretario di Estado, kardinal Piero Parolin, tabata embahador di Vatikano na Caracas.
Vatikano no a menshoná ken a partisipá den e enkuentro, pero potrèt di e delegashon ta mustra monseñor Edgar Peña Parra, supsekretario di Estado di Vatikano kende a nase na Venezuela. Su superior ta kardinal
Pietro Parolin, kende ta eksperto riba temanan venezolano ya ku el a fungi komo un nunsio apostóliko den e pais suramerikano.
Maduro a pidi Vatikano pa yuda ku e kombersashonnan. Fransisco a bisa ku ámbos parti mester pidi mediashon eksterno.
E delegashon venezolano a reuní ku ministernan italiano di interior i relashon eksterior. E gobièrnu populista italiano, dividí entre e movementu derechista i e Movementu Sinku Strea ‘anti-establishment’, a apstené di rekonosé Guaidó komo presidente legítimo di Venezuela apesar ku vários otro parti si a hasi esaki.
E Ministerio di Relashon Eksterior di Italia a identifiká e otro miembronan di e delegashon komo Fransisco Sucre, presidente di Komishon di Relashon Eksterior di Asamblea Nashonal di Venezuela kende ta oponé kontra Maduro; e eks alkalde di Caracas Antonio Ledezma i Rodrigo Diamanti, un aktivista identifiká komo representante di Guaidó.
E kasa di Ledezma, Mitzy De Ledezma, a bisa na reporteronan ku e mensahe di e delegashon pa gobièrnu di Italia ta bon kla: mester respaldá e movementu di Guaidó pa fasilitá un transishon na Demokrasia pa Venezuela.
