SIUDAT VATIKANO, HOLY SEE, AFP.- Vatikano a bisa djabièrnè ku a entregá 15 kaso sospechoso na fiskalnan na aña 2019, komo parti di Papa Fransisco su esfuersonan pa limpia Holy See su transakshonnan finansiero.
Outoridat di Informashon Finansiero (AIF) a bisa den su rapòrt anual ku a registrá 64 “rapòrt di aktividat sospechoso” na aña 2019 i a manda 15 dokumento pa ofisina di fiskal di Vatikano.
E kasonan ta kontené krímennan manera froude internashonal, inkluyendo froude fiskal i labamentu di plaka, indikando ku normanan mas kla a permití pa detektá e kasonan di mal kondukta.
AIF a wòrdu instalá na aña 2010 i a keda diseñá pa prevení labamentu di plaka i finansiamentu di terorismo. Ademas, e instituto ta duna transparensia tokante operashonnan di Instituto di Trabounan Religioso (IOR), kual ta fungi komo Banko Vatikano entre otro.
IOR, kual tabata embolbí den un serie di skandal polítiko i finansiero durante e último dékadanan ku a pasa, ta manehá kuenta di tur empleado i klérigo di Vatikano, kongregashonnan religioso i diplomátikonan afiliá ku Holy See.
