CARACAS, AP.- Venezuela a ninga djamars ku dos venezolano ku a muri despues di pone un eksplosivo riba un karetera di Colombia tabata guardia nashonal. Esaki tabata un atake di gueria di Ehérsito di Liberashon Nashonal, segun indikashon di outoridat kolombiano.
E minister di Defensa di Venezuela, hefe general Vladimir Padrino Lopez, a bisa na prensa ku ta “kompletamente falsu” ku e venezolanonan “tabata òf a presta su servisio na Guardia Nashonal”.
E deklarashon a tuma lugá dos dia despues ku e presidente kolombiano Juan Manuel Santos a bisa na un kanal di televishon ku ta investigando si un di e dos miembronan di ELN ku a muri den e atentado tabatin vínkulo ku Guardia Nashonal debí na e identifikashon indikando ku “el a pertenesé òf tabata pertenesé” na kuerpo militar venezolano.
Despues di e atake ku eksplosivo dia 11 di febrüari, e komandante di forsa militar di Colombia, general Alberto Mejia, a anunsiá ku ELN a usa venezolanonan den su atentadonan.
E gobièrnu di Santos a disidí pa suspendé kombersashonnan ku ELN luna pasá, kual tin kasi 1.500 miembro, debí na un serie di atake kontra puestonan polisial i militar i e infrastruktura petrolero kaminda mas di 12 persona uniformá i 23 miembro di e grupo rebelde a muri.
