CARACAS, AP.- Asamblea Nashonal ku mayoria opositor, a kuminsá e debate pa un proyekto di lei ku ta duna amnistia na militar i funshonarionan polisial ku yuda restablesé demokrasia i Konstitushon, kual a wòrdu violá pa Maduro. E proyekto a wòrdu aprobá durante e promé debate, pero mester kontinuá ku e di dos diskushon pa su aprobashon final.
E mando militar di Venezuela ta konfia ku ningun miembro di forsa armá lo entregá na e preshon di oposishon pa akohé na un plan di amnistia si nan stòp di respaldá presidente Nicolás Maduro.
Forsa armá ta e base prinsipal ku sostené Maduro su gobièrnu, i ounke e militarnan di rango medio òf abou ta gravemente afektá pa e krísis ekonómiko, no ta evidente te kon leu e partido opositor ta logra influensiá nan.
E hefe militar di 55 aña, a kritiká e proyekto di lei di amnistia, konsiderando esaki komo un “instrumento di manipulashon” i a bisa den un entrevista na un periodista di Telesur ku “ta un gran eror” pa pidi forsa armá pa aktua kontra konstitushon.
E lider di oposishon a hasi vários petishon na forsa armá pa no rekonosé Maduro i restablesé demokrasia, pero te ainda no tin ningun reakshon konkreto.
