PARADISE, CALIFORNIA, MERKA, AP.- Outoridat a pidi un laboratorio ambulante di DNA i antropólogonan pa identifiká e mortonan, segun e búskeda pa víktimanan di e kandela di mondi mas destruktivo ku California a konosé.
E sifra di víktimanan na ámbos ekstremo di e estado a oumentá na 25 djadumingu i posiblemente e lo sigui oumentá.
E kandela mas grandi tabata na nort, kaminda e vlamnan a redusí e pueblo di Paradise, di 27.000 habitante na ruina. E kandela a laga por lo ménos 23 víktima.
E komisario di kondado Butte, Kory Honea, a bisa ku el a buska mas individual pa uni e ekiponan di reskate.
Komisaria di polis a elaborá un lista di 110 persona ku paradero deskonosí. Outoridat a ekspresá speransa ku mayoria ta safe, pero sin por komuniká ku nan sernan kerí.
E bomberonan no a logra hasi avansenan konsiderabel durante anochi kontra e kandela. E dia anterior, e kandela aki a wòrdu kontené ku 20% i e siguiente dia ku 25%, segun e agensia di bombero Cal Fire.
Pero e bosero di Cal Fire, Bill Murphy, a bisa ku e rafaganan di bientu pronostiká pa djaluna mainta por provoká “konduktanan eksplosivo na e kandela”.
