LONDRES (AFP).- E laborista Vaughan Gething a keda eligí komo promé minister di Wales pa e parlamento lokal. Ku esei el a bira e promé persona koló skur pa liderá un dje nashonnan di Reino Uní.
Gething a nase na Zambia di mayornan tata di Wales i mama di Zambia.
Ku esaki, e lidernan di tres dje kuater gobièrnunan di Reino Uní no ta blanku, den un paso grandi pa e normalisashon di diversidat den e pais.
E promé minister dje pais, Rishi Sunak, ta di asendensia indio, miéntras ku mayornan dje promé minister independista eskoses, Humza Yousaf, a emigrá di Pakistan.
Ademas, e di kuater nashon di Reino Uní, Nort Irlanda, ta dirigí pa un dama, Michell O’Neill, partidario di unifikashon dje isla.
E alkalde di Londres, Sadiq Khan, ku ta buska un di tres mandato, ta yu di inmigrantenan pakistani.
E aktual minister di ekonomia di Wales, Vaughan Gething, eks-abogado di 50 aña, ta remplasá Mark Drakeford (69), ku a anunsiá su retiro den desèmber despues di sinku aña di trabou.
Wales ta bira e promé nashon di Europa goberná pa un hende di koló”, segun Gething a bisa despues di a keda eligí.
“Ta motibu di orguyo pa e Wales moderno, pero tambe ta un gran responsabilidat pa mi”, segun el a duna di konosé.
E dirigente a bisa di ta kere ku lo e “keda insultá riba retnan sosial”, i mester enfrentá “personanan ku ta kuestioná su motivashon” òf inkluso su nashonalidat. Pero e dirigente nobo a bisa di ta orguyoso di liderá un pais “yen di speransa, ambishon i union”.
Na Wales, e gobièrnu lokal ta outónomo den hopi asuntu manera salú, edukashon i transporte.
Vaughan Gething a keda eligí djasabra último komo lider nobo di Partido di Labor den un votashon interno dje partido, ganando ku 51.7% di e votonan kontra e minister di edukashon, Jeremy Miles.
