WILLEMSTAD – Winthrop Curiel, pa hopi aña e kara di Prins Bernhard Fonds riba e islanan aki, a fayesé den fin di siman. El a nase na Kòrsou dia 18 di febrüari 1934 i a muri dia 29 di desèmber pa kuartu pasá di tres atardi.
Winthrop a lanta na Ser’i Otrobanda, bishitando skolnan di bario, hasiendo deporte. El a desaroyá su mes den un hòmber respetá pa un i tur.
Winthrop a traha pa gobièrnu i Universidat di Kòrsou, dunando lès di ‘adjunct commies’. Komo presidente di Prins Bernhard Fonds (22 aña) e tabata hopi apresiá pa Kas Real di e tempu ei.
Komo Presidente di Buurt Centrum Janwé (20 aña) el a laga un sentro di bario atras ku ta funshoná na un nivel haltu ketu bai.
Winthrop tabata un hòmber íntegro ku hopi humor i semper kla pa duna konseho.
Pa su trabounan ehersé den Prins Bernhard Fonds el a keda ku Stichting Winthrop Curiel ku tin e meta pa duna hóbennan oportunidat pa desaroyá nan talento riba tereno di muzik.
No tin duda ku Winthrop Curiel tabatin un bida fruktífero.