WASHINGTON, AP.- E gobièrnu merikano a akusá 12 ofisial di inteligensia ruso di infiltrá kòmpiuternan den un intento pa manipulá elekshon presidensial di 2016.
E akusashonnan a wòrdu anunsiá pa Departamento di Hustisia nèt despues di un kumbre entre e presidente merikano i kontraparte ruso Vladimir Putin. Esaki ta e señalashon mas evidente te ainda ku Rusia a purba interferí den elekshon merikano. e agensianan di seguridat merikano a indiká ku Rusia a purba yuda e kampaña di Trump i perhudiká e demókrata Hillary Clinton.
Segun e dokumento, e rusonan a purba infiltrá kuentanan di e-mail elektróniko di dirigentenan demókrata, entre nan esun di e Komité Nashonal di e partido, esun di e grupo ku tabata koordiná e kampañanan elektoral legislativo, i esun di e kampaña di Clinton.
E proseso ta pasa na momentu ku fiskal spesial Robert Mueller ta investigá denunsianan ku tabatin un koordinashon entre e rusonan i personanan yegá di Trump pa purba manipulá elekshon. Sinembargo, e proseso hudisial aki no ta akusá ningun persona yegá di Trump di partisipá den e hacking, òf di ta den kontakto ku algun di e funshonarionan ruso aki. No tabatin denunsia tampoko ku e konteo di votonan a wòrdu manipulá.
