NOVO HAMBURGO, BRASIL, AFP.- Por lo ménos 13 persona a muri i kuater ta pèrdí despues di ku un siklon a pasa entre djaweps i djabièrnè na sùit di Brasil, kaminda míles di persona a wòrdu transladá pa refugionan, asina outoridatnan lokal a informá djamars.
Awaseru kontinuo i bientu fuerte a kousa desaster den desénas di munisipio den estado Rio Grande do Sul, inkluyendo kapital Porto Alegre, den e último tragedia relashoná ku klima ku a gòlpia e pais suramerikano.
“E kantidat di víktima fatal a subi na 13, i ainda ta buskando”, despues ku a haña e di dos kadaver den siudat di Caraá, un di e zonanan ku a wòrdu afektá mas, segun indikashon di Defensa Sivil di e estado riba Twitter. E konteo tabata 11 morto djasabra.
E kantidat di personanan pèrdí a wòrdu registrá na 20 pero esaki a sigui baha djasabra, despues ku a haña algun persona bibu.
“Tin kuater persona pèrdí”, tur den Caraá, un siudat ku tin 8.000 habitante na kosta di e estado, 90 km for di Porto Alegre, segun Defensa Sivil.
Outoridatnan a informá tambe ku mas di 3.700 persona a keda ku kasnan parsialmente destrosá i alrededor di 700 a keda evakuá for di zonanan ku tabata den peliger. Aparte di esaki 84.000 famia a sufri un interupshon den e servisio di koriente den e region.
