MPONDWE, MERKA, AFP.- Famianan deskonsolá a reuní na un mortuario na Uganda djadumingu pa buska notisia di nan sernan kerí, despues di un atake di un grupo di rebelde ku a kousa 41 morto na un skol. Mayoria víktima ta alumnonan di e skol.
Papa Francisco a kondená e “atake brutal” i a bisa ku el a resa pa e hóbennan djadumingu, na momentu ku el a topa ku fielnan na Plasa San Pedro di Vaticano.
Presidente Yoweri Museveni a klasifiká e atake komo un akto “desesperá, kobarde” i a primintí ku lo eliminá esnan responsabel.
Por lo ménos 41 persona a wòrdu masakrá den oranan di djabièrnè anochi na un skol sekundario na parti ost di e pais, ku ta situá serka di Repúblika Demokrátiko di Congo (RDC). Akinan e milisia yihadista ku a wòrdu akusá ku e atake tin nan bastion.
E víktimanan a wòrdu ataká ku machete, tiru òf nan a wòrdu kimá den e skol Lhubiriha.
Ehérsito i polis a akusá Forsa Aliado Demokrátiko (ADF), un grupo rebelde afiliá na e grupo yihadista Estado Islámiko.
Den e atake aki, 17 alumno hòmber a pèrdè nan bida, kimá den nan kamber kolektivo. Binti mucha muhé a keda masakrá ku machete, segun indikashon di e promé dama di Uganda i minister di Edukashon, Janet Museveni. Un bewaker tambe a muri, segun indikashon di outoridatnan.
E atake di djabièrnè tabata e atake mas sangriento na Uganda desde 2010, temporada ku 76 persona a muri den un atake na Kampala, ehekutá pa e grupo yihadista somalí Al Shabab.