CARACAS, VENEZUELA, AFP.- Un hòmber a wòrdu kondená na 17 aña di prizòn na Venezuela pa sekuestrá un muhé i abusá di dje seksualmente durante mas ku tres dékada, segun indikashon di fiskal ayera.
Arestá den yanüari 2020, Matías Salazar mester kumpli un “kondena di 17 aña i dos luna di prizòn” pa “violensia seksual, menasa i violensia sikológiko”, asina e fiskal general, Tarek William Saab, a publiká riba Twitter.
E kaso aki, ku a kousa konmoshon den e pais karibense, a sali na kla despues ku un muhé identifiká komo Morella León a hui di e apartamentu unda e tabata koutivá pa 31 aña, serka di e siudat di Maracay (estado di Aragua).
León a wòrdu fòrsá pa tene relashon seksual a kambio di awa i kuminda, segun indikashon di prensa lokal.
Un otro muhé, kende tin un yu i kende tabatin un relashon ku Salazar pa 23 aña, a denunsi’é un ratu despues ku Morella León a hui, pa violensia sikológiko i a pidi un òrdu di distansia segun medionan di komunikashon lokal, ku a reportá ku e tambe tabata víktima di sekuestro.
