YAKARTA, INDONESIA, AP.- Por lo ménos 20 persona a muri djaluna den protestanan violento kousá pa un rumor. Segun e rumor, un maestro a insultá un studiante indígena den provinsia di Papua na Indonesia, segun informashon di outoridat.
E manifestantenan a sende edifisionan públiko inkluyendo diferente kas, komersio, outo i motersaikel riba e kaminda ku ta yega na despacho di e gobernador lokal na Wamena, segun informashon di e hefe polisial Rudolf Rodja.
Por lo ménos 16 sivil a muri na Wamena. Mayoria a keda pega den nan kas òf negoshi na kandela, segun indikashon di e bosero militar Eko Daryanto. El a agregá ku un sòldat i tres sivil a fayesé den un otro protesta na Jayapura, e kapital di e provinsia di Papua.
Mas o ménos 65 sivil a resultá herida na Wamena i sinku polis a resultá gravemente heridá na Jayapura, segun indikashon di e bosero.
Rodja a bisa ku e protesta a kuminsá despues di rumornan ku un maestro di skol sekundario na Wamena a yama un studiante di etnia outóktono “makaku”.
El a splika ku tin vários rumor similar ta kore den e komunidatnan nativo.
