WASHINGTON,USA (AFP).- Alex Murdaugh, abogado miembro di un famia finansieramente hopi fuerte na Merka kende aña pasá a keda kondená na bida largu pa a mata su kasá i yu, awor a risibí sentensia adishonal di 40 aña pa delitonan finansiero.
Murdaugh, di 55 aña, a komparesé atrobe den un tribunal dje estado di South Carolina, e biaha‘ki pa keda kondená pa akusashonnan federal di konspirashon pa kometé froude bankario i elektróniko.
E hues di distrito Richard Gergel a sentensi’é na 40 aña di prizòn, kastigu ku e mester kumpli pareu ku otro kondena di 27 aña ku el a risibí aña pasá.
E hòmber a risibí e sentensia despues di a deklará su mes kulpabel den 2023 di akusashonnan na South Carolina pa a hòrta miónes di dollar di su klientenan i di su prominente ofisina di abogado spesialisá den kasonan di leshonnan personal.
“El a hòrta su klientenan sin ku e tabata preokupá su mes, el a hòrta su bufèt di abogado i otro personanan ku tabata konfia den dje”, segun e hues.
Alex Murdaugh ya tabata kumpli ku kadena perpetuo pa morto den yüni di 2021 di su kasá Maggie (52), i su yu mas chikí, Paul (22), riba un propiedat familiar kaminda nan sa bai pa yag.
E pruebanan hañá riba telefòn selular di Paul a indiká ku Murdaugh tabata e úniko persona kende tabata huntu ku e víktimanan na e ‘boerderij’ dje famia, vários minüt promé ku a tira nan mata. Murdaugh a nenga e asesinatonan, pero a atmití di a hòrta miónes di dollar di su klientenan.
