NEW YORK, AP. – McDonald’s anunsiá e eliminashon di algun ingrediente artifisial di opshonnan mas popular di su menú, miéntras e kompania kier transformá su imágen di sirbi kuminda prosesá.
Ku e medida nobo, e kompania lo kushina Chicken Nuggets i otro platonan sin konservador artifisial i retirá ‘corn syrup’ di pan pa hamburger. E kambionan ta tuma lugá miéntras e restorant di hamburger mas grandi na mundu ta purba rekuperá algun kliente i ta enfrentá tres aña konsekutivo di bahada den kantidat di kliente den Merka.
Becca Hary, representante di McDonald’s no a rospondé na e pregunta di desde ki temporada e empresa lo kuminsá retirá e ingredientenan aki.
Ta trata di e ehèmpel mas resien kaminda kadenanan di restorant ta purba mehorá su imágen debí ku su platonan ta enfrentá kompetensia di rivalnan menor i ku ta primintí un alternativa mas natural. Dunkin’Donuts por ehèmpel, a primintí di agregá mas webu na su “egg patty”. Aktualmente, e tortia ta parse un webu hasá, pero en realidat esaki ta un komposishon di ingrediente ku ta inkluí webu, awa i fékula di maishi modifiká. Komo parti di su esfuerso pa retirá e ingredientenan artifisial, Taco Bell a bisa aña pasá ku lo kuminsá usa peper pretu di bèrdat na lugá di e sabor di peper pretu.
