LONDON, AP.- Polis na London a saka Julian Assange, fundadó di WikiLeaks, for di e embahada di Ecuador djaweps i a poné den un trùk di polis. Esaki a inisiá un posibel bataya den korte pa e no wòrdu ekstraditá pa Merka i enfrentá kargonan relashoná ku publikashon di míles di dokumento sekreto di gobièrnu.
E aresto a sosodé despues ku Ecuador a retirá e asilo diplomátiko ku a wòrdu otorgá na dje durante kasi shete aña. E presidente ekuatoriano Lenin Moreno a bisa den un tweet ku su gobièrnu a tuma un “desishon soberano” pa retirá e asilo diplomátiko for di Assange dor ku “el a violá konvenshonnan internashonal reiteradamente i tambe e protokòl di kombibensia”.
Departamento di Hustisia a akusá Assange di asosiá ku Chelsea Manning, un eks analista di inteligensia, a penetrá e kòmpiuter di e gobièrnu den Pentágono.
Manning, kende a pasa vários aña den prizòn na Merka pa filtra informashon klasifiká ta wòrdu demandá atrobe na Alexandria, Virginia, pa ninga di deklará dilanti un hurado investigadó ku ta dirigí e kaso di WikiLeaks.
E aktivista oustraliano di 47 aña lo bringa kualkier kargo ku Merka presentá, segun abogado di Assange a bisa.