WASHINGTON, AP.- Akusando Beijing di “ignorá” e kompromisonan ku a wòrdu lográ durante negosiashonnan, e representante di Komersio di Merka Robert Lighthizer a bisa djaluna ku Washington lo oumentá e impuestonan riba 200.000 mion dòler di produkto chines desde djabièrnè.
Un delegashon komersial chines ta programa pa yega e kapital di Merka djaweps pa reanudá e negosiashonnan, un dia despues di loke a programa originalmente.
Den un reunion ku reporteronan, ni Lighthizer ni e sekretario di Finansa Steven Mnuchin no a duna mas detaye i Beijing no a duna komentario.
Mnuchin a indiká ku funshonarionan di Donald Trump su gobièrnu a haña sa ku outoridat chines ta “purbando di ignorá algu” ku a wòrdu negoshá den 10 ròndu di kombersashon anteriormente.
E impuesto lo subi di 10% na 25%. Trump a anunsiá e plannan aki via Twitter djadumingu, ekspresando su frustrashon ku e ritmo di negosiashonnan. E lista ta varia entre produktonan manera wante di beisbòl i sistemanan di alarma pa kas.
Trump ta lansando un desafio pa e gobièrnu chines. E pais mester efektuá kambionan amplio den e pais su modelo ekonómiko òf enfrentá e konsekuensianan.