CARACAS, AP.- E detenshon di visepresidente di Asamblea Nashonal i prosesonan hudisial kontra nuebe di su miembronan tabata un sla fuerte pa oposishon venezolano. E partido a motivá e pueblo pa protestá den e pais kompleto fin di siman den un reto nobo kontra mandatario Nicolás Maduro.
E akshonnan kontra e opositornan ta wòrdu konsiderá komo un “kontra atake” di gobièrnu pa demostrá ku ainda e ta sufisiente fuerte despues di e lantamentu militar frakasá di 30 di aprel. Apesar ku Juan Guaidó a pèrdè inmunidat parlamentario, e no a wòrdu detené.
Oposishon venezolano den eksterior a pidi e komunidat internashonal pa kondena e aresto di Zambrano i e prosesonan hudisial kontra otro legisladornan. Antonio Ecarri, embahador di Guaidó na Spaña, a bisa ku “indiferensia no ta un opshon”.
Zambrano su detenshon a wòrdu rechasá pa Union Europeo, 11 pais di e region di Grupo di Lima i Ofisina di Komishonado pa Derechi Humano. Michelle Bachelet a pidi outoridat venezolano pa liber’é i para e atakenan kontra Asamblea Nashonal i su miembronan.
Zambrano, di 63 aña, a wòrdu detené pa polis polítiko (SEBIN) riba djárason anochi.