WASHINGTON, AP. – E gobièrnu merikano a suspendé temporalmente e buelonan ku haitianonan deportá miéntras e pais den Karibe ta rekuperando di e gòlpi ku orkan Mattew a kousa, asina e sekretario di seguridat nashonal Jeh Johnson a bisa ayera.
Outoridatnan ta traha ku e gobièrnu haitiano pa reanudá buelonan mas pronto posibel asina Johnson a sigui bisa.
E suspenshon di e buelonan no ta kambia e polítika nobo aprobá pa Merka di arestá haitianonan, resientemente detené na frontera i pone nan den proseso di deportashon. Luna pasá, e departamento di seguridat Nashonal a anunsiá e plan pa arestá i deportá haitianonan ku a kaba di yega. Antes di esaki e imigrantenan a keda permití pa drenta Merka bou di e loke konosé komo visa humanitario.
Míles di imigrante haitiano a keda detené na frontera den último 12 luna, kompará ku algun shen aña pasá. E direktor di servisio di kontrol di imigrashon i duana Sarah Saldanja a bisa legisladónan ku luna pasá funshonarionan den sentro Amérika a avisá den un biahe resien ku ku asta 40 mil haitiano tabata direkshon pa Merka.
